देवदह । देवदह प्रिमियर लिग (डिपिएल) को उपाधि बिर्ता राईनोजले जीतेको छ । सोमबार सम्पन्न फाइनल खेलमा खैरेनी ग्ल्याडिएटर्स लाई २६ ले पराजित गर्दै बिर्ता राईनोज तेस्रो सिजनको उपाधि रक्षा गरेको हो ।
सोमबार फाइनल खेलमा टस जितेर बिर्ता राईनोजले २० ओभरमा ६ विकेटको क्षतिमा १५८ रन बनायो । बिर्ता राईनोजका लागि अमित यादवले अभिजित ५१ रन, ईन्द्रजित यादवले ३६ र अर्बार अलिले ३४ रन प्रहार गरे । खैरेनीका लागि सुरज शारु र शाजाद आलामले समान २-२ विकेट लिएका थिए।
जवाफमा १५९ रनको लक्ष्य सहित मैदानमा उत्रिएको खैरेनी ग्य्लाडिएटर्सले २० ओभरको समाप्तीमा ९ विकेटको क्षतीमा १३२ रनमा समेटिएपछि खेल बिर्ताले जितेको हो । खैरेनीका लागि रुपेश कुर्मीले ४५ रन, सागर काफ्ले र अनिल यादवले समान १४-१४ रनको योगदान दिएपनि त्यो जितको लागि प्रयाप्त हुन सकेन । खैरेनीलाई जितबाट रोक्नको लागि बिर्ताका धर्मेन्द्र यादवले ३ विकेट, अमित पाठक र ईन्द्रजित यादवले २-२ विकेटको योगदान गरे । खेलमा बिर्ता राईनोजका अमित यादव प्लेयर अफ दि म्याच घोषित भए ।
फाईनल खेल सकिएसंगै विजेता टिम तथा खेलाडीहरुलाई पुरस्कार वितरण गरिएको छ । देवदह नगरपालिकाका नगर प्रमुख ध्रुव प्रसाद खरेलले एक समारोहका बिच विजेता टिम तथा खेलाडीहरुलाई पुरस्कार, शिल्ड तथा मेडल प्रदान गरे ।
प्रतियोगितामा विजेता बनेसँगै प्रथम हुने बिर्ता राईनोजले नगद २ लाख रुपैंयासहित ट्रफी, मेडल र प्रमाणपत्र प्राप्त गरेको छ । यस्तै उपविजेता खैरेनीले नगद १ लाख सहित मेडल र प्रमाणपत्र प्राप्त गरेको खेल संयोजक गोपाल भण्डारीले जानकारी दिए ।
