बेनी — स्थानीय तह निर्वाचनमा गठबन्धन नगर्न कार्यकर्ताले दबाब दिइरहेका बेला गृहमन्त्री खाँणले स्थानीय तह निर्वाचनमा गठबन्धन बनाएर जानु पर्ने बताएका छन् । गृहमन्त्री बालकृष्ण खाँणले नेता तथा कार्यकर्ताहरूलाई खोलो तरेपछि लौरो नबिर्सन आग्रह गर्दै गठबन्धन तोड्न नहुने बताएका थिए । यस्तै संसद्‍को अंकगणित फेरबदल नहुँदासम्म प्रदेश र संघको चुनावमा पनि गठबन्धनलाई कायम राखिने उनले बताए ।

‘जसको सहयोग र सहकार्यको जगमा सरकारमा छौं । खोलो तरेपछि लौरो बिर्सनु हुँदैन । स्थानीय तहमा पाँच दलीय गठबन्धन कायम रहन्छ । शुक्रबार नेपाल छन्त्याल संघको सातौं जिल्ला अधिवेशन उद्घाटन गर्न बेनी आइपुगेको गृहमन्त्री खाँणले बेनीस्थित कांग्रेस कार्यालयमा कार्यकर्तालाई साम्बोधन गर्दै भने, ‘स्थानीय निर्वाचनमा मात्र होइन प्रदेश र संघको निर्वाचनपछि पनि संसद्‍को अङ्कगणित फेरबदल नहुँदासम्म सहकार्य र गठबन्धन रहन्छ ।’