चितवनमा भारतीय कन्टेनर गाडीमा लुकाएर ल्याइएको ४४३ किलो गाँजासहित दुई जना भारतीय नागरिक पक्राउ परेका छन् ।
राप्ती नगरपालिका–१ लोथरस्थित प्रहरी चेकिङ पोइन्टमा बिहीबार बिहान प्रहरीले चेकजाँच गर्ने क्रममा गाँजा बरामद गरेको हो ।
इलाका प्रहरी कार्यालय भण्डारा र अस्थायी प्रहरी पोष्ट लोथरबाट खटिएको संयुक्त प्रहरी टोलीले हेटौँडाबाट चितवनतर्फ आउँदै गरेको एनएल ०१०७७९२ नम्बरको भारतीय कन्टेनर जाँच गर्ने क्रममा चालक सिटपछाडिको क्याबिनमा फल्स बटम बनाई लुकाइएको अवस्थामा गाँजा फेला पारेको हो ।
प्रहरीले गाँजासहित कन्टेनर चालक भारतको वैशाली जिल्ला, ग्राम चर्खाजेका २४ वर्षीय सत्यम कुमार र सहचालक वैशाली जिल्लाकै बाबन घाटका २० वर्षीय रौनक कुमारलाई पक्राउ गरेको जनाएको छ ।
बरामद गरिएको गाँजा र पक्राउ परेका दुवै जनामाथि थप अनुसन्धान भइरहेको प्रहरीले जनाएको छ ।