काठमाडौं । हाल देशका पश्चिम तथा मध्य भू-भागमा पश्चिमी र स्थानीय वायुको प्रभाव देखिएको छ। मङ्गलबार कोशी प्रदेशका अधिकांश क्षेत्रमा मनसुनी वायुको प्रभाव सक्रिय रहेको जल तथा मौसम पूर्वानुमान महाशाखाले जनाएको छ।
महाशाखाका अनुसार आज दिउँसो कोशी र लुम्बिनी प्रदेशसहित देशका पहाडी भू-भागमा आंशिकदेखि सामान्य बदली रहनेछ, भने बाँकी भू-भागमा मौसम सफादेखि आंशिक बदली रहने सम्भावना छ। ती क्षेत्रहरूका केही स्थानमा मेघगर्जन र चट्याङसहित हल्कादेखि मध्यम वर्षा हुन सक्ने पूर्वानुमान गरिएको छ। साथै, देशका उच्च पहाडी तथा हिमाली भागका एक-दुई स्थानमा हल्का वर्षा र हिमपातको सम्भावना पनि रहेको छ।
आज रातिको अवस्थामा कोशी, लुम्बिनी र गण्डकी प्रदेशसहित देशका पहाडी क्षेत्रहरूमा आंशिकदेखि सामान्य बदली रहनेछ, भने बाँकी भू-भागमा मौसम सामान्य रूपमा सफा वा आंशिक बदली रहनेछ। यस्तै, कर्णाली प्रदेशका उच्च पहाडी तथा हिमाली भू-भागका एक-दुई स्थानमा पनि हल्का वर्षा र हिमपातको सम्भावना रहेको महाशाखाले जनाएको छ।
