प्रहरीले कपिलवस्तुको शिवराज नगरपालिका–चन्द्रौटाबाट सुनका गहना चोरी गरेको आरोपमा दुई जना पाकिस्तानी महिला पक्राउ गरेको छ। वडा प्रहरी कार्यालय चन्द्रौटाको टोलीले उनीहरूलाई पक्राउ गरेको प्रहरी नायब उपरीक्षक रिपेन्द्रकुमार सिंहले बताए ।
पक्राउ पर्नेमा २० वर्षीया विवि कलसुम र ४१ वर्षीया सहबाना रहेका छन् । उनीहरूको साथबाट पाकिस्तानी पासपोर्टसमेत बरामद गरिएको प्रहरीले जनाएको छ ।
प्रहरीका अनुसार चैत ३० गते साँझ करिब ५ः३० बजे सामान्य ग्राहकको रूपमा सुन पसलमा प्रवेश गरेका उनीहरूले सुन किन्ने बहानामा चोरी गरेका थिए । चोरीपछि पसलबाट बाहिर निस्कँदा मास्कमाथि बुर्का लगाएर पहिचान लुकाउने प्रयास गरेको पनि खुलेको छ । उनीहरूले रुपन्देहीको योगीकुटी क्षेत्रको एक सुनचाँदी पसलमा समेत चोरी गरेको तथ्य फेला परेको प्रहरीले जनाएको छ ।
प्रारम्भिक अनुसन्धान अनुसार पक्राउ परेका महिलाहरूले रुपन्देहीको योगीकुटी, कपिलवस्तुको तौलिहवा र चन्द्रौटामा गरी तीन स्थानमा चोरी गरेको खुलेको छ । उनीहरूले नगद देखाउने तथा गहना हेर्ने बहानामा सुन चोरी गर्ने शैली अपनाएको पाइएको छ ।
हाल उनीहरूविरुद्ध चोरी तथा ठगीसम्बन्धी मुद्दामा अनुसन्धान भइरहेको वडा प्रहरी कार्यालय चन्द्रौटाले जनाएको छ ।
