देवदह । ३१औं जनयुद्ध दिवसको अवसरमा देवदहमा रक्तदान कार्यक्रम सम्पन्न भएको छ । शुक्रवार नेपाली कम्युनिष्ट पार्टी नगर कमिटिको योजनामा सम्पन्न कार्यक्रममा ४५ पिन्ट रगत जम्मा भएको जनाइएको छ ।
यसै बीच कार्यक्रममा बोल्दै नेकपा रुपन्देही क्षेत्र नं १ का उम्मेदवार घनश्याम यादवले गणतन्त्र, धर्म निरपेक्षता, समावेशी प्रतिनिधित्व जस्ता राजनीतिक परिवर्तनको जग जनयुद्ध भएको बताए । ‘हजारौं शहिद, बेपत्ता र घाइते योद्धाको संघर्षले अहिलेको परिवर्तन आएको हो ।’ उनले भने, ‘अब आर्थिक, सामाजिक परिवर्तन आवश्यक छ, त्यसको नेतृत्व गर्न नेकपा तयार छ ।’
उम्मेदवार यादवले जनयुद्धमा बगेको रगतले नेपाली जनतालाई अधिकार दिलाएको उल्लेख गर्दै यसरी गरिने रक्तदान जस्ता सामाजिक कार्यले समाज रुपान्तरणमा महत्वपूर्ण भूमिका निर्वाह गर्ने बताए ।
कार्यक्रममा नेकपा देवदह संयोजक दीपक न्यौपानेसहित पार्टीका केन्द्र, प्रदेश र जिल्ला तहका नेताहरुको सहभागिता रहेको थियो ।
यसै सन्दर्भमा आज बेलुका देवदहको खैरेनी, शंकरपुर र चरंगेमा दीप प्रज्ज्वलन समेत गरिने पार्टीले जनाएको छ ।
