नेपाली राष्ट्रिय कृकेट टिममा प्रमुख सदस्य तथा पुर्व कप्तान सन्दीप लामिछाने सान्सिक प्रोडक्सन म्युजिक कम्पनीको सीईओ बनेका छन ।
उनी सान्सिक प्रोडक्सन नामको म्युजिक कम्पनीमा जोडिएका हुन् । यो कम्पनीमा उनको ४५ प्रतिशत सेयर रहने छ । कम्पनीका संस्थापक सीइओ अनमोल थापा हुन् । बाँकी ५५ प्रतिशत सेयर थापासँगै रहने गरी सम्झौता भएको छ । यस कम्पनीले गीत उत्पादनका साथै म्युजिक भिडिओको निर्माण समेत गर्दै आएको छ ।
सान्सिक प्रोडक्सनले थुप्रै चर्चित गीतहरु बजारमा ल्याइसकेको छ । प्रतिभाशाली तर ‘अन्डररेटेड’ कलाकारहरुलाई यसले महत्व दिने गर्छ । यस कम्पनीले ल्याएका गीतहरुमा सुबोक केसीको आवाज रहेको ‘म हराएँ‘’, गौरव राइको ‘लग्यो रे’, ओयसिस थापाको स्वरमा ‘अन्तिम बिदाइ’, नितेशजंग कुँवरको स्वरमा ‘स्वर्गकी परी’ आदि चर्चित छन् ।
सन्दीप संगीतमा विशेष रुची राख्छन् । क्रिकेटपछि उनको सोख संगीत हो । उनले केही गीतहरु गाएर रेकर्ड पनि गराएका छन् । सन्दीप केही समयअघि नेपाल क्रिकेट संघ (क्यान) को सेन्ट्रल कन्ट्र्याक्टबाट बाहिरिएका थिए । त्यसले गर्दा उनलाई क्रिकेटबाहिर अन्य क्षेत्रमा सक्रिय हुन सहज भएको छ । सेन्ट्रल कन्ट्र्याक्टमा नरहेपछि उनले क्यानबाट मासिक तलव पाउने छैनन् । उनी एक–दुई दिनमा नेपाली राष्ट्रिय टिमको बन्द प्रशिक्षणमा जोडिने तयारीमा रहेका छन् ।
