देवदह । देवदह माध्यमिक विद्यालयले सोमबार एक विशेष समारोहका बीच आफ्नो ४१ औं वार्षिकोत्सव तथा अभिभावक दिवस भव्य रूपमा मनाएको छ । कार्यक्रम विद्यालय व्यवस्थापन समितिका अध्यक्ष सुरज खरेलको अध्यक्षता र देवदह नगरपालिकाका नगर प्रमुख ध्रुव प्रसाद खरेलको प्रमुख आतिथ्यतामा विद्यालय प्रांगणमा भएको थियो ।
कार्यक्रममा सम्बोधन गर्दै नगर प्रमुख ध्रुव प्रसाद खरेलले शिक्षाको गुणस्तर वृद्धिका लागि शिक्षक, अभिभावक, र राज्यका निकायहरू सबैले समान रूपमा जिम्मेवारी रहेको बताउनुभयो । नगर प्रमुख खरेलले देशका सबैभन्दा योग्य शिक्षकले अध्यापन गराउने सामुदायिक विद्यालयहरू नमूना विद्यालय बन्नुपर्नेमा जोड दिनुभएको थियो । त्यसका लागि सबै पक्ष अझ बढी उत्तरदायी बन्नुपर्ने बताउनुभएको थियो । उहाले देवदह नगरपालिकाले शिक्षाको गुणस्तर सुधारका लागि शिक्षक दरबन्दी मिलान र नगर शिक्षकको व्यवस्था गरेको जानकारी गराउनुभएको थियो ।
कार्यक्रममा देवदह नगरपालिकाका प्रमुख प्रशासकीय अधिकृत कृष्ण प्रसाद सापकोटाले सामुदायिक विद्यालयको शिक्षामा शिक्षकहरूको योगदानको चर्चा गर्दै शिक्षण पेशालाई निष्ठापूर्वक निर्वाह गर्ने शिक्षकहरूबाट सबैले सिक्नुपर्ने बताउनुभयो । 
सोही अवसरमा देवदह नगरपालिका वडा नं ७ का वडाध्यक्ष कृष्ण प्रसाद अधिकारी, वडा नं ९ का वडाध्यक्ष मोहन जिसी, लिलाधर पाण्डे लगायतले आ-आफ्नो भनाई राख्नु भएको थियो । विद्यालयका प्रधानाध्यापक हरि पाण्डेले वार्षिक प्रतिवेदन प्रस्तुत गर्दै विद्यालयको प्रगति विवरण प्रस्तुत गर्नुभएको थियो । कार्यक्रममा संस्थापक प्रधानाध्यापक, उत्कृष्ट शिक्षक-कर्मचारी, र उत्कृष्ट विद्यार्थीहरूलाई सम्मान तथा पुरस्कार वितरण गरिएको थियो।
कार्यक्रम सहायक प्रधानाध्यापक मेघराज घिमिरेको स्वागत मन्तव्य, र शिक्षकहरू इन्दिरा अर्याल तथा रिता पाण्डेको संचालनमा सम्पन्न भएको थियो ।
