पाल्पा। पाल्पा निस्दी गाउँपालिका – ४ , मित्यालको , लामेदमारमा १५ वर्षपछि बिजुली बलेको छ । लामेदमार ट्रान्समिटर अन्तर्गत सोमबार यहाँको ५५ घरमा बत्ती बलेको हो।
बिजुली बत्ती बलेपछि गाउमा खुसीयाली छाएको स्थानीय लिल बहादुर आलेले बताउनुभयो। उहाले भन्नुभयो,’अब त बत्ती बलेको देख्ने आश मरिसकेको थिएँ , तर अहिले सपना झै लागेको छ।’ लामो समयको पर्खाइमा बत्ती बल्न पाएपछि धेरै ठूलो राहत महशुस गर्नुका साथै स्थानीयहरु खुशी भएको जीवन ज्योति आधारभूत विद्यालयका प्रधानाध्यापक चित्र सिंह आलेले बताउनुभयो । यहाँको लामेदमार , बेलखरक , गोठडाँडा , खोर्मोक , रिपाहा , पोखरादहर , थोक्सिबास गाउँका करिब १ सय घरमा बत्ती बल्नुपर्नेमा केही टोलमा वयरिङको काम नसकेकोले एकै चरणमा बत्ती बल्न नपाएको कार्यपालिका सदस्य हेम कुमारी सुनारीले बताउनुभएको छ ।
सामुदायिक विधुतिकरण लामेदमार ट्रान्समिटरको उद्घाटन गर्नुहुँदै गाउँपालिका अध्यक्ष मुक्त बहादुर सारुले बत्ती बल्न सहयोग पुर्याउनु हुने सबैलाई धन्यवाद दिनुभएको छ । साथै सारुले निस्दीमा चाडो बिद्युत सेवा विस्तार गर्न सबैको सहयोग र सहकार्यको निरन्तर खाँचो रहने बताउनुभएको छ । यहाँको ५ वटा वडामा विद्युत बल्ने जिम्मा लालीगुँरास सामुदायिक विद्युतीकरण सहकारी संस्था गल्धाले लिएको छ। निस्दीको ७ वडामध्ये ५ वटा वडामा बिद्युतिकरण हुन बाकि रहेको सहकारी संस्थाका अध्यक्ष दुर्गा बहादुर सोमईले जानकारी दिनुभयो ।
