कपिलवस्तु । कपिलवस्तुमा रहेको जगदीशपुर ताललाई पंक्षी आरक्ष घोषणा गरिएको छ । शनिबार एक कार्यक्रमकाबीच लुम्बिनी प्रदेशका मुख्यमन्त्री कुलप्रसाद केसी ‘सोनाम’ ले ताललाई पंक्षी आरक्ष घोषणा गर्नुभयो ।
उहाँले कार्यक्रमलाई सम्बोधन गर्दै ताललाई पाहुना चरामैत्री बासस्थान बनाउन सकिने बताउनुभयो । जगदिशपुर तालको प्राकृतिक हिसावले नभत्काउन, पर्यावरणमा ध्यान दिँदै काम गरेमा प्रदेश सरकारले बजेटको कुनै अभाव हुन नदिने मुख्यमन्त्री केसीको भनाई थियो ।
उहाँले बजेटको अभाव भन्दा पनि योजना र लगनशीलताको अभाव भएकाले अब बन मन्त्रालयले पहल लिन र त्यसमा प्रदेश सरकारले आवश्यक बजेटको व्यवस्था गर्ने प्रतिवद्धता व्यक्त गर्नुभयो ।
तालको कुल क्षेत्रफल २२५ हेक्टर र पानीको क्षेत्रफल १६१.५४ हेक्टर रहेको तालमा ६२०० हेक्टर सिचाईबाट करिव ६७०० घरधुरी लाभाविन्त भएका छन् । नेपालका १० वटा सिमसार क्षेत्रहरु मध्ये यो तालपनि सूचीकृत भएको छ ।
तालमा ३२ प्रजातिका स्तनधारी चराहरु पाइन्छ । तालमा डुवल्की चरा, खङखङे चरा, सिन्धुरे चरा, कैलो टाउके, हरी हासले, सुडसिडिया, चिम चिमे, जल रंक, जलेवा, लगायत गरी २९५ प्रजातीका चराहरु पाइन्छ ।
तालमा नेपालमा पाइने २०१ मध्ये ४३ प्रजातीका माछा पाइन्छ ।
