कपिलबस्तु । नेकपा एमालेका महासचिव शंकर पोखरेलले जनताको मोर्चाले परमादेशबाट गठन भएको ५ दलीय गठबन्धन नामको परमादेशी मोर्चालाई परास्त गरेरै छाडने उदघोष गर्नुभएको छ । कपिलबस्तुमा आज आयोजित बृहत पार्टी प्रवेश कार्यक्रममा बोल्दै महासचिव पोखरेलले यस्तो घोषणा गर्नुभएको हो ।
‘देशभरी एमाले प्रवेश गर्नेहरुको लहर छ, एमालेलाई घेराबन्दी गरेर देशलाई असफल बनाउन खोज्नेहरु बिरुद्धको नागरीकको मोर्चा बनेको छ, त्यसको नेतृत्व एमालेले गरेको छ । अवको निर्वाचनमा परमादेशी मोर्चालाई जनताको मोर्चाले परास्त गरेरै छाडने छ,’ लुम्बिनी प्रदेशका संस्थापक मुख्यमन्त्रीसमेत रहनुभएका एमाले महासचिव पोखरेलले भन्नुभयो ।
उहाँले अव एमालेसँग लडन सक्ने ताकत पाँच दलीय मोर्चामा पनि नभएको ठोकुवा गर्नुभयो । ‘अव मुलुक बिकास र समृद्धीको बाटोमा हिडन चाहन्छ एमालेले नै बिकास र समृद्धीको अगुववाई गर्छ भनेर एमालेलाई चौतर्फी घेराबन्दी गरीयो तर जनताको लहर एमालेप्रति छ भन्ने तथ्य स्थापित भइसकेको छ,’ पार्टी प्रवेश कार्यक्रममा पोखरेलले भन्नुभयो, ‘एमाले स्वाभिमान र स्वाधिनताका पक्षमा हिडेका कारण जनताको लहर एमालेप्रति आर्कषित भएका कारण घेराबन्दी गरीयो । अव एमालेले कपिलबस्तु त जित्छ जित्छ देश भरी नै जित्छ ।’
महासचिव पोखरेलले मुलुकको बिकासको नेतृत्व गर्ने नायक केपी ओली नै रहेको तथ्य पनि राख्नुभयो । ‘अवको मुल काम जनताको जिवनमा परिवर्तन ल्याउने कुरा हो, मुलकको समृद्धीको नायक नेकपा एमाले हो, समृद्धी नेपाल सुखी नेपालीको राष्ट्रिय आकांक्षाको नायक केपी ओली हो,’ पोखरेलले भन्नुभयो, ’हिजो एमालेलाई मधेश बिरोधी बनाईयो तर मधेशका जनताले पत्याएनन, तराई मधेशको बिकासको अभियान केपी ओलीको नेतृत्वमा सूरु भएको हो। अरुबाट त्यो सम्भव छैन भन्ने मधेशका जनताले बुझिसक्नु भएको छ ।’
