भैरहवा । नेपाली कांग्रेस रुपन्देहीले ‘घरघर जाऔं, कांग्रेस जिताऔं’ भन्ने अभियान सफल पार्ने विभिन्न कार्यक्रम गर्ने भएको छ । स्थानीय तहको निर्वाचनमा कांग्रेसका उम्मेदवारलाई बढी भन्दा बढी सिटमा जिताउन पार्टीको केन्द्रिय समितिले सुरु गरेको ‘घरघर जाऔं, कांग्रेस जिताऔं’ अभियानलाई सफल बनाउन कांग्रेस रुपन्देहीले पनि अभियान चलाउने भएको हो । कांग्रेस केन्द्रिय कार्यसमितिको २५ गते बुधबार बसेको बैठकले देशभर ७७ वटै जिल्लामा केन्द्रिय सदस्य प्रतिनिधिको रुपमा खटाएको छ ।
कांग्रेस केन्द्रिय समितिको निर्णय बमोजिम रुपन्देही जिल्लाको लागि केन्द्रिय प्रतिनिधिको रुपमा पार्टीका प्रभावशाली नेता, केन्द्रिय समिति सदस्य, पूर्व अर्थ राज्यमन्त्री उदय शमशेर राणा आउने भएका छन् । अभियान फागुन २९ देखि चैत २९ गतेसम्म १ महिनासम्म हुने कांग्रेस रुपन्देहीका सभापति रामकृष्ण खाँणले जानकारी दिए । जनताको कुरा सुन्न कांग्रेस घर–घरमा जानको लागि २९ गते केन्द्रिय समिति सदस्य, पूर्व अर्थ राज्यमन्त्री उदय शमशेर राणाको उपस्थितिमा पार्टीले आम भेला राखेको उनले जानकारी दिए ।फागुन २९ गते भेला र ३० गते बैठक राखिएको छ । उक्त भेलाको लागि कांग्रेस रुपन्देहीले महासमिति सदस्य, महाधिवेशन प्रतिनिधि, क्षेत्रीय सभापतिहरु, उपमहानगर नगरपालिका, नगरपालिका, गाँउपालिका, वडा तहका सम्पूर्ण पदाधिकारी सदस्य र अन्य क्रियाशिल सदस्यहरुलाई भैरहवा पार्टी कार्यालयमा उपस्थितिको लागि कांग्रेसले आव्हान गरेको छ ।
