सुरज भट्टराई, रुपन्देही। शनिबार हुन लागेको देवदह खानेपानी उपभोक्ता तथा सरसफाई संस्थाको निर्वाचनका लागि उम्मेद्वारहरु छुट्टाछुट्टै प्यानल बनाएरै चुनावी मैदानमा होमिएका छन् । एकल उमेदवारी दिएको एमालेले निर्वाचनमा ६ दलिय गठबन्धनको सामना गर्नुपर्ने छ।
नेकपा माओबादी केन्द्र, नेपाली काङ्ग्रेस , राप्रपा, राष्ट्रिय जनमोर्चा , नेकपा एकीकृत समाजबादी र क्रान्तिकारी माओबादीले गठबन्धनको तर्फबाट उमेदवारी दिएका छन।
एमालेले पार्टीका जिल्ला कमिटी सदस्य तथा देवदह खानेपानीका निवर्तमान अध्यक्ष गुमानसिह कुवरलाई अध्यक्षका रुपमा अघि सारेको छ भने, गठबन्धनले नेकपा माओवादी केन्द्रका मोतिलाल ढकालको नेतृत्वमा प्यानल बनाएर चुनाबी मोर्चा कसेको छ।
यसैवीच, एमाले तर्फका अध्यक्षका उम्मेद्वार कुंवरले खैरेनीमा बिहिबार बिहान पत्रकार सम्मेलन मार्फत चुनाबी प्रतिबद्वता सार्वजनिक गर्नुभएको छ ।उहाँले सहलगानीको आयोजनालाई सम्पन्न गर्ने,दुई सय किलोमिटर पाइप विस्तार गर्ने कार्यलाई पुर्णता दिने, धारा जडान तथा महसुल मूल्य घटाउने, फिल्टर प्लान्ट निर्माण गरि उपभोक्तालाई शुद्ध र स्वच्छ पानी उपलबध गराउने लगायतका प्रतिवद्धता गर्नुभएको छ।
निर्वाचनको मिती नजिकिएसंगै मतदातालाई आफ्नो पक्षमा तान्न उम्मेद्वारहरु घरदैलो गरिरहेका छन । देवदह खानेपानीमा ४ हजार ३ सय मतदाता छ्न।
