दाङमा प्रहरीले सञ्चालन गरेको स्वीप अप्रेसनमा १६२ जनालाई विभिन्न अभियोगमा नियन्त्रणमा लिएको छ ।
जिल्ला प्रहरी कार्यालय दाङका अनुसार लागूऔषध नियन्त्रण तथा रोकथाम अभियानलाई सुदृढ बनाउने उद्देश्यले बैशाख ९ गतेदेखि १३ गतेसम्म चार दिनसम्म उक्त अभियान सञ्चालन गरिएको थियो ।
प्रहरीका अनुसार नियन्त्रणमा लिइएका मध्ये १३९ जना पुरुष र २३ जना महिला रहेका छन् । तीमध्ये १५ जनाविरुद्ध लागूऔषध सम्बन्धी मुद्दा, १ जनाविरुद्ध चोरी सम्बन्धी मुद्दा तथा ५ जनाविरुद्ध अभद्र व्यवहार सम्बन्धी मुद्दामा अनुसन्धान भइरहेको जिल्ला प्रहरी कार्यालय दाङका सूचना अधिकारी तथा डिएसपी रेशम बोहराले जानकारी दिए ।
यसैबीच २ जनालाई पुनर्थापना केन्द्र पठाइएको छ भने अन्य १३४ जनालाई सम्झाइबुझाइ गरी छोडिएको प्रहरीले जनाएको छ ।
साथै फरार सूचीमा रहेका ५ जना प्रतिवादीलाई पनि पक्राउ गरिएको छ । उनीहरूलाई अदालतबाट विभिन्न समयमा फैसला भई १ वर्ष ३ महिना कैद र ३५ सय रुपैयाँ जरिवाना तोकिएको थियो ।
प्रहरीले ४० ग्राम ५५० मिलिग्राम लागूऔषध ९ब्राउन सुगर० समेत बरामद गरेको जनाएको छ । लागूऔषध दुरुपयोगमुक्त समाज निर्माणका लागि प्रहरीले विभिन्न समयमा सचेतनामूलक कार्यक्रम सञ्चालन गर्दै आएको डिएसपी बोहराले जानकारी दिए ।
