रोल्पा । लुम्बिनी प्रदेशका सभामुख पूर्ण बहादुर घर्तीमगरले संघीय प्रणाली खराब नभएको तर यसका नेतृत्वकर्ताहरुमा खराबी देखिएको बताउनुभएको छ । जसका कारणले गर्दा अहिले संघीता विरोधी आवाजहरु उठ्न थालेको उहाँको भनाई छ । रोल्पामा भएको पत्रकार भेटघाट कायर्यक्रममा उहाँले भन्नुभयोः–“ संघीय प्रणालीलाई सुधार गर्दै जाने हो तर हामी सबै जिम्मेवारी भएनौ भने हाम्रै कारणले नै असफल हुन सक्छ त्यसमा सबै जिम्मेवार बनौँ ।”
उहाँले नेपालको आमूल परिवर्तनका लागि गरिएको बलिदान, त्याग, तपस्याबाट संघीयता प्राप्त भएको बताउँदै संघीयताको आवश्यकता मात्रै नभएर अनिवार्यता नै भएको बताउनुभयो । अहिले संघीयता विरोधीहरुले संघीयता खारेजीको कुरा गरिरहेको जिकिर गर्दै यसका रक्षाका लागि सबै मिलेर प्रतिवाद गर्नुपर्ने बताउनुभयो । उहाँले भन्नुभयोः–“संघीयता आम नेपाली आमाका सन्तानहरुको बलिदान, राजनीतिक दलहरुको साझा आन्दोलनबाट आएको हो । त्यसैले संघीयता नयाँ शासन पद्धती भएकाले आवश्यकता छ, संघीयता विरोधीहरुले नै खारेज गर्न खोजेका छन् तर ती शक्तिको विरुद्धमा सबैले सचेत हुनुपर्दछ । ” उहाँले नेपालमा संघीयताको खारेजी होइन कि यसमा देखिएको समस्या तथा गलत प्रवितिलाई अन्त्य गर्नुपर्ने बताउनुभयो ।
