ललितपुरको पटनस्थित दरबार स्क्वायरमा बुधबार भएको विभत्स हत्यापछि धारिलो हतियारसहित भागिरहेका कसुदारलाई नियन्त्रणमा लिने प्रहरी महिला पुरस्कृत भएकी छन् ।
इमाडोलका सिर्जन नेम्वाङ र सुमित नेम्वाङलाई चक्कु हानेर हत्या गरेपछि चक्कुसहित भागेका सञ्जीव नेपालीलाई प्रहरी प्रभाग, मंगलबजारमा कार्यरत प्रहरी जवान साहाना बोहराले नियन्त्रणमा लिएकी थिइन् ।
उनलाई शुक्रबार जिल्ला प्रहरी परिसर, ललितपुरका प्रमुख एसएसपी होविन्द्र बोगटीले नगर पुरस्कारद्वारा पुरस्कृत गरेका छन् । उनले साहसिक कार्य गरेको भन्दै पुरस्कृत भएको एसएसपी बोगटीले बताए ।
सहानाको साहसिक काम यस्तो थियो
प्रहरी देख्नासाथ कृष्ण मन्दिरको पछाडितिरबाट सञ्जीव भागिरहेका थिए । बाटोमा प्रहरी जवान साहाना र एक पुरुष लाठी बोकेर ड्युटीमा तैनाथ थिए । त्यसमध्ये साहाना सञ्जीवको पछिपछि दौडिइन् । करिव २०० मीटरसम्म लखेटेपछि हातमा चक्कु बोकेका सञ्जीवसँग ती साहाना आमनेसामने भइन् ।
त्यसपछि उनले चक्कु बोकेको हातमा करिव चार–पाँच पटक लाठीले हानिन् । चक्कु भुइँमा खस्यो । सञ्जीव एउटा रेष्टुरेण्टमा लुक्न पुगे । साहाना प्रहरी रेष्टुरेण्टभित्रै छिरिन् । सञ्जीवलाई नियन्त्रणमा लिँदा साहानामाथि दुव्र्यवहारको प्रयास गरेका थिए । तर, वरिपरि भएका मानिसले साथ दिँदा साहाना उनलाई पक्राउ गर्न सफल भएकी थिइन् ।
