पूर्वी क्षेत्र निजी विद्यालय परिवार (ईप्सा) देवदह रुपन्देहीको आयोजनामा यही २०८२ को एसईई परीक्षामा सम्मिलित हुने संगठनमा आवद्ध ५ सय २० जना विद्यार्थीहरुलाई एकदिने अभिमुखीकरण कार्यक्रम सम्पन्न गरेको छ ।
बर्षभरि विभिन्न अतिरिक्त कार्यक्रम तथा खेलकुद महोत्सव, शिक्षक तालिम र विभिन्न शैक्षिक बहस जस्ता रचनात्मक कार्यक्रम सम्पन्न गरिसकेको संगठनले परीक्षाको सम्मुखमा विद्यार्थीहरुलाई हौसला प्रदान गर्न र परीक्षालाई सहजरुपमा ग्रहण गर्नका लागि उत्प्रेरणात्मक तथा अभिमुखीकरण कार्यक्रम सम्पन्न गरिएको अध्यक्ष राम बहादुर गुरुङले बताउनुभयो । देवदह क्षेत्र देशभरिमा उत्कृष्ट नतिजा ल्याउने नगरपालिका भएकोले सो नतिजा ल्याउनमा संगठनले आयोजना गर्ने यस्ता कार्यक्रमको महत्वपूर्ण भूमिका रहेको उहाँले बताउनुभयो ।
सो कार्यक्रमको सहजीकरण प्रशिक्षक ईश्वर श्रेष्ठले गर्नुभएको थियो । उहाँले विद्यार्थीहरुको मनोबललाई उच्च बनाउनको लागि विभिन्न प्रसंग र तथ्यहरुलाई जोड्दै निकै रोचक र उत्कृष्ट तरिकाबाट प्रशिक्षण गर्नुभएको कार्यक्रममा उपस्थित शिक्षकहरुले बताउनु भएको छ । कार्यक्रम अध्यक्ष रामबहादुर गुरुङको अध्यक्षता कोषाध्यक्ष कृष्णप्रसाद गैरेको स्वागत र सचिव बिनोद थापामगरको सञ्चालनमा सम्पन्न भएको थियो ।
