देवदह । आसन्न प्रतिनिधि सभा सदस्य निर्वाचनको मिति नजिकिएसँगै रुपन्देही क्षेत्र नं. १ मा चुनावी सरगर्मी निकै चुलिएको छ । नेकपा एमालेका तर्फबाट उम्मेदवार बन्नुभएका नेता दधिराम न्यौपानेलाई यतिबेला घरदैलो भ्याई नभ्याई छ । यसै क्रममा आज देवदह र तिलोत्तमा नगरपालिकामा घरदैलो कार्यक्रम सम्पन्न भएको छ ।
घरदैलोका क्रममा मतदाताहरूको उत्साहजनक सहभागिता देखिएको सो पार्टीले जनाएको छ । विशेष गरी जेष्ठ नागरिकहरूले न्यौपानेलाई विजयको शुभकामना दिँदै एमाले सरकारले ल्याएको सामाजिक सुरक्षा भत्ता र विकासका काम बिर्सिन नसकिने बताएका थिए । अर्कोतर्फ, नयाँ पुस्ता अर्थात् जेन्जी युवाहरूमा पनि एमाले र न्यौपाने प्रति विशेष आकर्षण देखिएको छ । युवाहरूले देशको आर्थिक समृद्धि र रोजगारीका लागि एमालेकै नेतृत्व आवश्यक रहेको भन्दै उम्मेदवार न्यौपानेलाई साथ दिने प्रतिबद्धता जनाएका छन ।
घरदैलोका क्रममा उम्मेदवार न्यौपानेले सुकुम्बासी समस्या समाधान, भन्सार नाकाको स्तरउन्नती र सडक पूर्वाधारलाई मुख्य प्राथमिकता दिने बताउनु भएको छ । उहाँले हामी केवल आश्वासन होइन, काम गर्न आएको बताउदै समग्र क्षेत्रको मुहार फेर्न सूर्य चिन्हमा मतदान गरी एमालेलाई विजयी गराउन आग्रह समेत गर्नुभएको थियो । क्षेत्रको विभिन्न वडाहरूमा एमालेको पक्षमा जनलहर बढ्दै गएको स्थानीय नेताहरूको दाबी छ ।
