मुगुको छायाँनाथ रारा नगरपालिका–५, कार्कीवाडामा खुडा प्रहार गरी ७५ वर्षीय वृद्धको हत्या गरेको आरोपमा एक जना पक्राउ परेका छन् ।
जिल्ला प्रहरी कार्यालय मुगुका अनुसार असोज २७ गते बिहान करिब ८:२० बजे सोही स्थानका ३२ वर्षीय अजबिर कामीले ७५ वर्षीय धनबिर कामीमाथि धारिलो हतियार खुडा प्रहार गरेका थिए ।
खुडा प्रहारबाट गम्भीर घाइते भएका धनबिरलाई तत्काल उपचारका लागि जिल्ला अस्पताल मुगु लगिएको थियो । तर, चिकित्सकले उनलाई मृत घोषणा गरेका थिए ।
घटनापछि फरार भएका अजबिरको खोजीका लागि जिल्ला प्रहरी कार्यालय मुगुबाट प्रहरी नायब उपरीक्षक रविराज थपलियाको कमाण्डमा प्रहरी टोली परिचालन गरिएको थियो ।
खोजतलासका क्रममा प्रहरीले बिहान करिब ९:३० बजे छायाँनाथ रारा नगरपालिका–३ स्थित रारा ताल जाने जंगलमा भागिरहेको अवस्थामा उनलाई खुडासहित नियन्त्रणमा लिएको हो ।
घटनाबारे थप अनुसन्धान भइरहेको प्रहरीले जनाएको छ ।
