चितवनको रत्ननगर नगरपालिका वडा नम्बर १२ मा रहेको किसान दाना उद्योगको भित्ता भत्किदा तीन जना मजदुरको ज्यान गएको छ ।
चितवन प्रहरीका प्रवक्ता डिएसपी रविन्द्र खनालका अनुुसार दाना उद्योगको भित्ता भत्किदा खैरहनी नगरपालिका वडा नम्बर २ बस्ने ४५ वर्षका शुकराम दराइ, गोरखा घर भई हाल रत्ननगर न.पा.-१२ बस्ने बर्ष ५४ को रेशम दमाई र जिल्ला चितवन रत्ननगर न.पा.-१२ बस्ने ४५ वर्षका कमल गुरुङको मृत्यु भएको हो ।
प्रहरीका अनुसार बिहान ९ बजेर ५० मिनेट जाँदा उद्योगको दाना नम्बर ४ को बाल भत्किएको थियो । घटनामा अरु दुई जना मजदुर पनि घाइते भएका जनाइएको छ ।
घाइते हुनेमा पर्सा घर भई हाल रत्ननगर न.पा.१२ बस्ने वर्ष अ. ३९ को जितेन्द्र महतोको हात खुट्टामा चोट लागेको र पर्सा जिल्ला नै घर भइ रत्ननगर न.पा.-१२ बस्ने ४० वर्षका पंकज प्रसाद थारूको हात खुट्टामा चोट लागेको चितवन प्रहरीले जनाएको छ । घाइतेको चितवन मेडिकल कलेजमा उपचार भइरहेको जनाइएको छ।
