परराष्ट्र मन्त्रालयले कन्सुलर सेवा विभागको अनलाइन प्रणालीमार्फत हालसम्म मध्यपूर्वमा रहेका ८२ हजार १ सय नेपालीले आफ्नो विवरण दर्ता गराएको जनाएको छ।
शुक्रबार आयोजित नियमित पत्रकार सम्मेलनमा मन्त्रालयका प्रवक्ता लोकबहादुर क्षेत्रीले सुरुवातमा करिब ६ हजार जनाले आफूहरू असुरक्षित रहेको जानकारी गराएको भए पनि पछिल्ला दिनहरूमा त्यस्तो महसुस गर्नेको संख्या उल्लेख्य रूपमा घटेको बताए।
इजरायल, अमेरिका र इरानबीच बढ्दो तनावका बीच मन्त्रालयको आपतकालीन कक्षमा हालसम्म ७८ वटा कलसहित कुल १ सय ७० पटक सम्पर्क भएको उनले जानकारी दिए। उनका अनुसार सुरुका दिनहरूमा सुरक्षा सम्बन्धी जिज्ञासा धेरै आउने गरेकोमा अहिले भने श्रम स्वीकृति कहिले खुल्छ भन्नेबारे बढी सोधपुछ भइरहेको छ।
मन्त्रालयले आफ्ना १० वटै नियोगमार्फत समस्यामा परेका नेपालीहरूको अवस्थाबारे निरन्तर जानकारी लिने र आवश्यक समन्वय गर्ने काम भइरहेको जनाएको छ।
यसैबीच, हाल कुनै पनि नेपाली नागरिक विदेशका ट्रान्जिटमा नरहेको र जेद्दामा रहेका ५२ जना हजयात्रीसमेत स्वदेश फर्किसकेको मन्त्रालयले जनाएको छ।
सरकारले मध्यपूर्वमा रहेका नेपाली नागरिकको सुरक्षामा आफू गम्भीर रहेको जनाउँदै आवश्यक परे उद्धारका लागि पनि तयार रहेको जनाएको छ।
