देवदह ७ स्थित देवदह ईङ्लिस बोर्डिङ स्कुलमा विद्यार्थीहरूको ज्ञान, आत्मविश्वास तथा प्रस्तुति क्षमता अभिवृद्धि गर्ने उद्देश्यले हाजिरी जवाफ प्रतियोगिता सम्पन्न भएको छ। प्रतियोगितामा जम्मा आठ टिमको सहभागिता रहेको थियो।

प्रतियोगितामा टिम ‘ए’ प्रथम स्थान हासिल गर्न सफल भएको थियो। जसमा आहाना सुवेदी, कायरब नेपाली र मयुरा वि.क.ले उत्कृष्ट प्रदर्शन गरेका थिए। त्यसैगरी टिम ‘एफ’ का प्रियन काफ्ले, सिजन काफ्ले र सुरक्षा सारुले द्वितीय स्थान प्राप्त गरे भने टिम ‘सी’ का विवान क्षेत्री, इभाना पाण्डे र निर्देश चापागाईं तृतीय स्थान हासिल गर्न सफल भए।

कार्यक्रममा बोल्दै विद्यालयका प्राचार्य मनोज कुमार गैरेले यस्ता प्रतियोगिताले विद्यार्थीहरूमा प्रतिस्पर्धात्मक भावना, सामान्य ज्ञान तथा समूहगत कार्यक्षमता विकास गर्न महत्वपूर्ण योगदान पुर्‍याउने बताउनुभयो।

उक्त कार्यक्रम विद्यार्थी दिया न्यौपानेको सञ्चालन र कार्यक्रमको संयोजन अतिरिक्त क्रियाकलाप संयोजक सोनिया खनालले गर्नुभएको थियो।