३३ किलो सुन तस्करी र मोरङको उर्लाबारीमा सनम शाक्यको हत्या प्रकरणमा उच्च अदालत विराटनगरले मुख्य अभियुक्त ‘गोरे’ भनिने चुडामणि उप्रेतीलाई थप १० वर्ष कैद सजाय सुनाएको छ ।
उच्च अदालतले जिल्ला अदालत मोरङको फैसलालाई आंशिक रूपमा उल्ट्याउँदै अपहरण तथा शरीर बन्धक मुद्दामा गोरेलाई थप कैद तोकेको हो । यसअघि उनलाई कर्तव्य ज्यान मुद्दामा जन्मकैद सजाय दिइएको थियो ।
न्यायाधीश महेन्द्रनाथ उपाध्याय र प्रकाशचन्द्र अधिकारीको संयुक्त इजालासले आइतबार राति फैसला सुनाएको हो । माघ २० गतेदेखि निरन्तर सुनुवाइपछि यो निर्णय आएको हो ।
अदालतले केही अन्य प्रतिवादीहरूको सजाय भने घटाएको छ । २० वर्ष कैद सजाय पाएका नरेन्द्र कार्की, मोहन काफ्ले र भोजराज भण्डारीलाई अब १०–१० वर्ष मात्र कैद हुनेछ । साथै, मदन सिलवाललाई ३ वर्ष कैद सजाय सुनाइएको छ भने लाक्पा शेर्पा र भविन तामाङको हकमा पुरानै फैसला कायम गरिएको छ ।
तर करिब ३८ क्विन्टल सुन तस्करीसँग जोडिएको संगठित अपराध र भन्सार चोरी निकासी मुद्दामा भने अदालतले प्रमाण नपुगेको भन्दै सफाइ दिएको छ । पूर्वडीआईजी गोविन्द निरौला, एसएसपी श्याम खत्री लगायतले पनि सफाइ पाएका छन् ।
२०७४ सालमा दुबईबाट ल्याइएको ३३ किलो सुन गायब भएपछि सुरु भएको यो प्रकरणमा, सोही सुन खोज्ने क्रममा सनम शाक्यको यातना दिएर हत्या गरिएको थियो । हालसम्म पनि उक्त सुन फेला परेको छैन ।
