रत्ननगर नगरपालिका ४ की ६३ वर्षीय सुकमायादेवी तामाङको हत्या तथा लुटपाट अभियोगमा चितवन प्रहरीले ५ जनालाई नियन्त्रणमा लिएको छ ।
पुस २५ गते राति लुटपाट तथा हत्या गरिएको अवस्थामा आफन्तले २६ गते बिहान भेटेका थिए । घरको माथिल्लो तलामा एक्लै सुतेकी सुकमायाको हातखुट्टा तथा मुखसमेत बाँधेर हत्या भएको थियो ।
उक्त घटनामा संलग्न आरोपमा जितपुर सिमरा उपमहानगरपालिका-२२ घर भइ चितवन रत्ननगर-१० मा बस्दै आएका विजय भन्ने शुक्रबहादुर भोलन, बारा जितपुर सिमरा उपमहानगरपालिका-२२ कै ललितपुर-१० बस्ने सूर्यमान वाईवा पक्राउ परेका छन् ।
त्यसैगरी धादिङको थाक्रे गाउँपालिका-५ का ३२ वर्षीय बुद्धिमान लामा, स्याङ्जा बिरुवा गाउँपालिका-८ घर भई रत्ननगर ४ सिनेमारोड बस्ने ३१ वर्षको मिलन भन्ने कौबहादुर गुरुङ र मकवानपुर थाहा नगरपालिका-१२ घर भई काठमाडौं थानकोट बस्ने ४७ वर्षीय हीराबहादुर स्याङ्तान छन् ।
जिल्ला प्रहरी कार्यालय चितवनका प्रहरी उपरीक्षक गोविन्द पुरीका अनुसार उनीहरूबाट ना २५ प ६९६५ नम्बरको पल्सर मोटरसाइकल, बागमती प्रदेशको ०१-००२ ज ७९८५ नम्बरको इनड्राइभमा दर्ता भएको ट्याक्सी, मृतक तामाङले प्रयोग गर्ने मोबाइल फोन, मृतकको पैसा राखेको कपडाको पर्स १ थान र अन्य ७ थान मोबाइल बरामद गरिएको जनाइएको छ ।
प्रहरीका अनुसार शुक्रबहादुर भोलन दुई वर्षअघि तामाङको घरमा डेरा गरी बस्थे । भोलनले एक्लै बस्दै आएकी तामाङको आनीबानी र घरको अवस्था समेत जानकारी लिई हत्याको योजना बनाएको जनाएको छ । चितवन रत्ननगर नै डेरा गरेर बस्ने सूर्यमान वाइवा र कौबहादुर गुरुङ मिलेर अन्य तीनजनालाई सम्पर्क गरी हत्या तथा लुटपाटको योजना बनाएको स्वीकार गरेको एसपी पुरीले बताए ।
उक्त घटनामा इप्रका रत्ननगरका प्रमुख डीएसपी सुवास भट्टको टोलीले तालिमप्राप्त कुकुरसमेत परिचालन गरी अनुसन्धान गरेको थियो ।
डीएसपी भट्टका अनुसार चितवन बस्ने वाइवा र गुरुङले सूर्यमान वाइवा, बुद्धिमान लामा र हीराबहादुर स्याङ्तानलाई सम्पर्क गरी हत्याको योजना बनाएका स्वीकार गरेका छन् ।
पक्राउ परेक पाँचैजनालाई प्रहरीले कर्तव्य ज्यान र डाँका मुद्दामा अनुसन्धान अघि बढाइएको छ । कर्तव्य ज्यान मुद्दामा जन्मकैद र डाँका मुद्दामा ७ वर्षदेखि १४ वर्षसम्म र ७० हजारदेखि १ लाख ४० हजार रूपैयाँसम्म जरिबानाको प्रावधान छ ।
