थाइल्याण्डको उत्तर–पूर्वी क्षेत्रमा यात्रुवाहक रेल दुर्घटना हुँदा कम्तीमा २२ जनाको मृत्यु भएको छ भने ५५ जना घाइते भएका छन्।
समाचार संस्था अलजजिराका अनुसार बैंककबाट उबोन रत्चाथानीतर्फ जाँदै गरेको रेल बुधबार बिहान नाखोन रत्चासिमा प्रान्तको सिखियो जिल्लामा दुर्घटनाग्रस्त भएको हो।
उक्त रेल एउटा उच्चगतिको रेल मार्ग निर्माण भइरहेको स्थान मुनिबाट गुडिरहेको बेला माथि काम गरिरहेको निर्माणाधीन क्रेन भत्किएर रेलमा खसेको थियो। क्रेनको ठक्करपछि रेल लिकबाट बाहिरिएको र त्यसपछि केहीबेर आगलागीसमेत भएको स्थानीय रिपोर्टरले जनाएका छन्।
प्रारम्भिक रूपमा मृतकको संख्या चार मात्र बताइएको भए पनि पछि यो संख्या बढ्दै २२ पुगेको थाई प्रहरीले जनाएको छ। दुर्घटनामा घाइते भएका ५५ जनाको विभिन्न अस्पतालमा उपचार भइरहेको छ भने घटनास्थलमा अझै उद्धार तथा अनुसन्धान कार्य जारी रहेको प्रहरीले जनाएको छ।
