नेकपा एमालेको सचिवमा निर्वाचित भएका पूर्वमुख्यमन्त्री शेरधन राईका शुभेच्छुकहरूका लागि अर्को पनि खुशीको खबर आएको छ । उनी चाँडै बाबु बन्दैछन् ।
शेरधनकी पत्नी जाङ्मु शेर्पाले सामाजिक सञ्जालमार्फत दोस्रो खबर सार्वजनिक गरेकी हुन् । उनले पहिलोपटक आफ्नो बेबी बम्पसहितको तस्बिर पनि पोस्ट गरिन् । श्रीमानलाई एमाले सचिवमा निर्वाचित भएकोमा बधाई र शुभकामना दिने क्रममा जाङ्मुले आफू गर्भवती भएको घोषणा गरेकी हुन् ।
उनले लेखेकी छन्, ‘आज पार्टीको सचिव जस्तो गरिमामय पदमा निर्वाचित हुनुभएका मेरा जीवनसाथीलाई हृदयदेखि हार्दिक बधाई र सफल कार्यकालको शुभकामना । यो खुसीसँगै, हाम्रो जीवनमा आउँदै गरेको सानो मुटुको धड्कनको खबर पनि तपाईँहरूसँग बाँड्न मन लाग्यो ।’
नयाँ जिम्मेवारी, नयाँ सपना, र नयाँ जीवनको यात्रामा सबैको माया, आशीर्वाद र शुभेच्छाका लागि उनले अपिल गरेकी छन् ।
शेरधनले २०७७ साल माघमा जाङ्मुसित विवाह गरेका थिए । उनले कोशीको मुख्यमन्त्री भएकै बेला बिहे गरेका हुन् । त्यसबेला उनको उमेर ४९ वर्ष थियो भने जाङ्मु २३ वर्षकी थिइन् । जाङ्मु सन् २०१८ की मिस मंगोल हुन् ।
