पूर्वप्रधानमन्त्री एवं एमाले अध्यक्ष केपी शर्मा ओली र पूर्वगृहमन्त्री रमेश लेखकको रिहाइका लागि जिल्ला सरकारी वकिल कार्यालयको पत्र प्रहरीले प्राप्त गरेको छ ।
काठमाडौंका प्रहरी प्रमुख एसएसपी रमेश थापाले भर्खरै जिल्ला सरकारी वकिलको कार्यालयको पत्र प्राप्त भएको नेपाल प्रेसलाई बताए ।
उनका अनुसार अब जिम्मा जमानी बस्ने मानिस बोलाएर दुवैजनालाई रिहाइ गरिने छ ।
जेन्जी आन्दोलन घटना छानबिनका लागि गठित जाँचबुझ आयोगले दिएको प्रतिवेदनका आधारमा ज्यानसम्बन्धी कसुरमा उनीहरूलाई पक्राउ गरिएको थियो । तर, मुद्दा दायर गर्ने पर्याप्त आधार र प्रमाण नभएपछि उनीहरूलाई छाड्न लागिएको हो ।
पूर्वप्रधानमन्त्री एवं एमाले अध्यक्ष केपी शर्मा ओली र पूर्वगृहमन्त्री रमेश लेखकलाई गौरी बहादुर कार्की आयोगको छानविन भन्दै गृहमन्त्रीको निर्देशनमा प्रहरीले गत १४ गते दुवैजनालाई पक्राउ गरेको थियो ।
सर्वोच्चले उनीहरूविरूद्ध मुद्दा दायर गर्न वा २६ गतेसम्ममा छोड्न आदेश दिएको थियो । प्रहरी र महान्यायाधीवक्ता कार्यालयबीच मुद्दा दायर नगर्ने सहमति जुटेको जनाइएको छ ।
प्रहरीले गत १४ गते दुवैजनालाई पक्राउ गरेको थियो । लेखक प्रहरी हिरासतमा छन् भने ओली गम्भीर स्वास्थ्य समस्याका कारण टिचिङ अस्पतालमा भर्ना छन् । ओलीको पत्थरीको शल्यक्रिया गर्न चिकित्सकले सुझाएका छन् ।
