यात्रुलाई दुर्व्यवहार गरेको आरोपमा एकजना जिप चालकलाई प्रहरीले नियन्त्रणमा लिएको छ ।

पोखराबाट वालिङतर्फ जाँदै गरेको ग१ज ७०६६ नम्बरको जिप चालककले १६ वर्षीया बालिकालाई दुर्व्यवहार (अनुचित स्पर्श) तथा अस्वाभाविक व्यवहार गरेको आरोपमा पक्राउ गरेको जिल्ला प्रहरी कार्यालय स्याङ्जाले जनाएको छ ।

चालक ४९ वर्षीय अनबहादुर गुरुङलाई वालिङ नगरपालिका–१ रामबाच्छाबाट पक्राउ गरिएको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्न राज चौधरीले जानकारी दिए । गुरुङ स्याङ्जाकै बिरुवा गाउँपालिका-७ का हुन् ।

घटनाको अनुसन्धान भइरहेको प्रहरीले जनाएको छ । सात दिनको म्याद थप अनुमति लिएर चालकमाथि बाल यौन दुरुपयोगसम्बन्धी कसुरमा अनुसन्धान अगाडि बढाइएको नायव उपरीक्षक चौधरीले बताए ।