अख्तियार दुरुपयोग अनुसन्धान आयोगले पोखरा क्षेत्रीय अन्तर्राष्ट्रिय विमानस्थल निर्माणमा भ्रष्टाचार भएको दाबी गर्दै विशेष अदालतमा दोस्रो मुद्दा दायर गरेको छ।

अख्तियार स्रोतका अनुसार तत्कालीन पर्यटन सचिव केदारबहादुर अधिकारीसहित २१ जना व्यक्ति तथा दुई कम्पनीलाई प्रतिवादी बनाउँदै मुद्दा दायर गरिएको हो।

यसअघि अख्तियारले पहिलो मुद्दा दायर गर्दा विमानस्थल निर्माणमा राजस्व छुटलगायत विषयमा थप अनुसन्धान भइरहेको जनाएको थियो। सोही अनुसन्धानको निष्कर्षपछि दोस्रो चरणको मुद्दा दायर गरिएको बताइएको छ। पोखरा विमानस्थल निर्माणमा आर्थिक अनियमितता, राजस्व छुट र ठेक्का प्रक्रियासम्बन्धी विषयमा अख्तियारले लामो समयदेखि छानबिन गर्दै आएको थियो।