लुम्बिनी प्रदेशका विभिन्न जिल्लामा शुक्रबार भीषण हावाहुरीसहित वर्षा हुँदा जनजीवन प्रभावित भएको छ।

बुटवलसहित पश्चिमी क्षेत्रमा अचानक आएको हुरीका कारण दिउँसै अन्धकार जस्तै अवस्था सिर्जना भएको छ।

मौसम विज्ञान विभागले यसअघि नै दाङ, बाँके लगायत जिल्लामा हावाहुरीसहित वर्षा हुने पूर्वानुमान गर्दै आवश्यक सतर्कता अपनाउन आग्रह गरेको थियो। सोहीअनुसार अहिले ती क्षेत्रमा हल्का वर्षासँगै तीव्र हावाहुरी चलिरहेको छ।

हावाहुरीका कारण रुख ढल्ने, कमजोर संरचना उड्ने तथा विद्युत र सञ्चार सेवा प्रभावित हुने जोखिम बढेको छ। यसलाई मध्यनजर गर्दै स्थानीय प्रशासनले नागरिकलाई सुरक्षित स्थानमा बस्न र अनावश्यक बाहिर ननिस्कन अनुरोध गरेको छ।

यस्तै, बाँकेका केही स्थानीय तहले खराब मौसमका कारण आज बिदा समेत दिएका छन्। अहिले प्रभावित क्षेत्रमा अन्धकार जस्तै अवस्था देखिएको छ।