नेपाली कांग्रेसले आज (बिहीबार) सुर्खेत र बाँकेमा चुनावी सभा आयोजना गर्दैछ।
आसन्न प्रतिनिधि सभा निर्वाचनलाई लक्षित गर्दै पार्टीले दुई जिल्लामा छुट्टाछुट्टै कार्यक्रम तय गरेको हो।
कांग्रेस सुर्खेतका सभापति खड्गबहादुर पोखरेलका अनुसार मध्याह्न साढे १२ बजेपछि वीरेन्द्रनगर नगरपालिका स्थित घण्टाघर डबलीमा चुनावी सभा सुरु हुनेछ। सभालाई पार्टीका सभापति गगनकुमार थापा र उपसभापति पुष्पा भुसालले सम्बोधन गर्ने कार्यक्रम रहेको छ।
सुर्खेतको कार्यक्रमपछि आजै बाँके–३ अन्तर्गत जानकी गाउँपालिका–३ मानपुरमा पनि कांग्रेसको चुनावी सभा हुने जनाइएको छ। बाँके–३ का उम्मेदवारसमेत रहेका प्रदेश सभापति अमरसिंह पुनको सचिवालयले दिउँसो १:३० बजे मानपुरमा सभा आयोजना हुने पुष्टि गरेको छ। पुनका स्वकीय सचिव अनुपम जीसीका अनुसार उक्त सभालाई पनि सभापति थापाले सम्बोधन गर्नेछन्।
यसैक्रममा कांग्रेसले शुक्रबार रूपन्देहीको बुटवलमा समेत चुनावी सभा गर्ने तयारी गरेको जनाएको छ।
