देवदह। देवदहमा सम्पन्न तेस्रो राष्ट्रपति रनिङ शिल्ड छनोट प्रतियोगिताको उपाधि देवदह बुद्ध पब्लिक आवासीय माध्यमिक विद्यालयले जितेको छ। फागुन १ देखि ३ गतेसम्म तीन दिन सञ्चालन भएको प्रतियोगितामा उत्कृष्ट प्रदर्शन गर्दै विद्यालयले ११ स्वर्ण पदकसहित रनिङ शिल्ड उचालेको हो।
देवदह बुद्ध पब्लिक आवासीय माविले कुल ११ स्वर्ण, १० रजत र ६ कास्य पदक जित्दै समग्रतामा पहिलो स्थान हासिल गर्यो। प्रतियोगितामा सगरमाथा आवासीय माविले ६ स्वर्ण, ६ रजत र ७ कास्य पदकसहित दोस्रो स्थान प्राप्त गर्यो।
त्यस्तै, ग्रीनप्लान्ट आवासीय माविले ५ स्वर्ण, ४ रजत र १० कास्य पदक जित्दै तेस्रो स्थान हासिल गर्यो भने सेभेन स्टारले ४ स्वर्ण, ३ रजत र ३ कास्य पदकसहित चौथो स्थानमा रह्यो।
प्रतियोगितामा प्रथम हुने देवदह बुद्ध पब्लिक आवासीय माविले २५ हजार रुपैयाँ, द्वितीय स्थान हासिल गरेको सगरमाथा आवासीय माविले १५ हजार रुपैयाँ र तृतीय स्थानमा रहेको ग्रीनप्लान्ट आवासीय माविले १० हजार रुपैयाँ नगद पुरस्कार प्राप्त गरेका छन्। यसअघि पहिलो राष्ट्रपति रनिङ शिल्ड देवदह माविले जितेको थियो भने दोस्रो संस्करणमा बुद्ध पब्लिक आवासीय मावि विजेता बनेको थियो। यस वर्ष तेस्रो संस्करणको उपाधि पुनः बुद्ध पब्लिकले जित्दै आफ्नो वर्चस्व कायम गरेको छ।
