आकर्षक तलबको प्रलोभन देखाएर वैदेशिक रोजगारीमा पठाइदिने भन्दै ८० लाख रुपैयाँ ठगी गरेको अभियोगमा तीन जना पक्राउ परेका छन्।
प्रहरीले बिहीबार उनीहरूलाई सार्वजनिक गर्दै आवश्यक कारबाहीका लागि वैदेशिक रोजगार विभागलाई बुझाएको जनाएको छ।
प्रहरीका अनुसार पक्राउ पर्नेमा महोत्तरीको सम्सी गाउँपालिका–१ का जटाधर राउत, सोलुखुम्बुको थुलुङ गाउँपालिका–३ का थमराज नेपाली, तथा ललितपुरको महालक्ष्मी नगरपालिका–१ का रामकुमार राई रहेका छन्।
उनीहरूले बेलायत र रोमानियामा आकर्षक तलब पाइने भन्दै विभिन्न समयमा पाँच जना पीडितबाट ठूलो रकम असुलेका थिए। प्रारम्भिक अनुसन्धानअनुसार उनीहरूले पीडितहरूबाट जम्मा ८० लाख रुपैयाँ उठाएर सम्पर्कविहीन भएका थिए।
पीडितहरूको उजुरीपछि प्रहरीले अनुसन्धान अघि बढाई अभियुक्तहरूलाई नियन्त्रणमा लिएको हो। घटनासम्बन्धी थप अनुसन्धान भइरहेको प्रहरीले जनाएको छ।
