रौतहट–२ का उम्मेदवार सगिर आलमको गाडीको ठक्करबाट ४ वर्षीया बालिकाको ज्यान गएको घटनामा राष्ट्रिय स्वतन्त्र पार्टी (रास्वपा) ले गहिरो दुःख व्यक्त गर्दै निष्पक्ष छानबिनका लागि प्रशासनलाई पूर्ण सहयोग गर्ने जनाएको छ।
पार्टीका महामन्त्री कवीन्द्र बुर्लाकोटीले जारी गरेको विज्ञप्तिमा रास्वपाले यो घटनालाई अत्यन्त गम्भीर रूपमा लिएको उल्लेख गरेका छन्।
विज्ञप्तिमा भनिएको छ, “घटनाको वस्तुनिष्ठ छानबिनका लागि स्थानीय प्रशासनलाई पूर्ण सहयोग गर्न हामी प्रतिबद्ध छौँ। कानुनी प्रक्रिया र पीडित परिवारलाई न्याय दिलाउने सन्दर्भमा पार्टीले कुनै कसर बाँकी राख्ने छैन। साथै, पीडित परिवारलाई आवश्यक राहत र सहयोगका लागि पनि पार्टीले पहल गरिरहेको छ।”
रास्वपाले चुनावी अभियानका क्रममा प्रयोग हुने सवारी साधन सञ्चालनमा उच्च सतर्कता अपनाउन, सुरक्षा संवेदनशीलतालाई प्राथमिकता दिन पार्टीका उम्मेदवार, कार्यकर्ता तथा सवारी चालकलाई कडा निर्देशन दिएको जनाएको छ।
