राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र साह (बालेन) सहभागी कार्यक्रममा भीडको फाइदा उठाउँदै सुनको सिक्री लुट्ने गिरोह सक्रिय भएको खुलेको छ । कञ्चनपुर र अछाममा गरी कम्तीमा ६ जनाको सिक्री लुटिएको प्रहरीले जनाएको छ ।
कञ्चनपुरको झलारीमा बालेन पुगेको कार्यक्रममा धनगढीका मनोज चौधरी र सञ्जीव मल्लको सुनको सिक्री भीडमै लुटिएको थियो । उनीहरूले तत्काल प्रहरीमा उजुरी दिएका थिए ।
सीसीटीभी फुटेजका आधारमा खोजी भइरहेको अवस्थामा बिहीबार अछामको साँफेबगर नगरपालिका–४ स्थित रास्वपाको कार्यक्रममा पर्साको पकाहा मैनपुर गाउँपालिका–५ का ३१ वर्षीय उमेश राय पक्राउ परेका छन् ।
प्रहरीका अनुसार रायसहितको समूहले बालेन सहभागी कार्यक्रममा आएका ४ जनाको सिक्री लुटिसकेको र पाँचौँ व्यक्तिको चोर्ने क्रममा उनी पक्राउ परेका हुन् । अछाममा मात्रै ६ तोलाभन्दा बढी सुन चोरी भएको जनाइएको छ ।
अन्य संलग्नको खोजी जारी रहेको जिल्ला प्रहरी कार्यालय अछामले जनाएको छ ।
