जेनजी अगुवाका रूपमा परिचित सुधन गुरुङ राष्ट्रिय स्वतन्त्र पार्टी (रास्वपा) मा समाहित हुने भएका छन्।
उनले आज काठमाडौं महानगरपालिकाका मेयर बालेन्द्र साहसँगै रास्वपामा औपचारिक प्रवेश गर्ने बताएका छन्।
‘हामी नेपाल’ नामक संस्थाका संस्थापक गुरुङले यसअघि नै गोर्खाबाट उम्मेदवारी दिने घोषणा गरिसकेका छन्। आफ्नो उम्मेदवारीलाई रास्वपाले समर्थन गर्ने भएपछि उनी पार्टी प्रवेश गर्न लागेको बुझिएको छ।
सामाजिक सञ्जालमार्फत स्टाटस लेख्दै गुरुङले पद, शक्ति वा व्यक्तिगत स्वार्थका लागि नभई जनताको अपेक्षा र जिम्मेवारीप्रतिको प्रतिबद्धताबाट यो निर्णय लिएको उल्लेख गरेका छन्। उनले वैकल्पिक राजनीति, पारदर्शिता र जवाफदेहितालाई सुदृढ बनाउने लक्ष्यसहित रास्वपामा आबद्ध हुन लागेको बताएका छन्।
गुरुङको पार्टी प्रवेशले रास्वपामा युवाको सहभागिता थप बलियो हुने र आगामी निर्वाचनमा गोर्खा क्षेत्रमा राजनीतिक प्रतिस्पर्धा थप चर्किने अपेक्षा गरिएको छ।
