काठमाडौँ महानगर प्रहरी बलका प्रमुख राजुनाथ पाण्डेले आफ्नो पदबाट राजीनामा दिएका छन्। उनले माघ ४ गतेदेखि लागू हुने गरी पदबाट राजीनामा दिएको जानकारी दिएका हुन्।
पाण्डेले माघ ३ गतेसम्म आफू बहाल रहने र त्यसपछि औपचारिक रूपमा पदमुक्त हुने बताएका छन्। ‘चार गतेबाट लागू हुने गरी मैले राजीनामा दिएको हुँ,’ उनले भने, ‘माघ ३ गतेसम्म भने म आफ्नो जिम्मेवारीमै रहनेछु।’
काठमाडौँ महानगर प्रहरी बलको नेतृत्व सम्हाल्दै आएका पाण्डेले महानगरको शान्ति सुरक्षा, ट्राफिक व्यवस्थापन तथा अनुशासन कायम गर्न महत्वपूर्ण भूमिका निर्वाह गर्दै आएका थिए। उनको कार्यकालमा महानगर क्षेत्रभित्रका विभिन्न चुनौतीपूर्ण परिस्थितिमा प्रहरी बलको सक्रियता र समन्वय देखिएको थियो।
राजीनामापछि पाण्डे सक्रिय राजनीतिमा प्रवेश गर्ने तयारीमा रहेको बताइएको छ। उनले फागुन २१ गते हुने प्रतिनिधिसभा निर्वाचनमा उम्मेदवार बन्ने तयारी गरिरहेको स्रोतले जनाएको छ। यही उद्देश्यका लागि उनले सरकारी जिम्मेवारीबाट अलग भएर राजनीतिक यात्रातर्फ अघि बढ्ने निर्णय गरेको बुझिएको छ।
उनको राजीनामापछि काठमाडौँ महानगर प्रहरी बलको नेतृत्व कसले सम्हाल्ने भन्ने विषयमा महानगरपालिकाले चाँडै निर्णय गर्ने अपेक्षा गरिएको छ।
