देवदह नगरपालिकाका प्रमुख ध्रुव प्रसाद खरेलले घोषणापत्र पढेर सुनाउनु भएपछि उक्त घोषणा पत्र मानव सेवा आश्रमका अध्यक्ष अधिकारीलाई हस्तान्तरण गर्नुभएको थियो ।सोही क्रममा देवदहका वडाहरुलाई पनि ‘सहयोगापेक्षी सडक आश्रित मानवमुक्त’ वडाको पत्र हस्तान्तरण गरिएको थियो।

जिल्ला समन्वय समिति रुपन्देहीका प्रमुख उमाकान्त चपाई, देवदह नगरपालिका प्रमुख ध्रुव प्रसाद खरेल, उपप्रमुख विद्या लक्ष्मी गुरुङ, प्रमुख प्रशासकीय अधिकृत मधुकृष्ण पौड्याल, वडा अध्यक्षहरु, जनप्रतिनिधि, विभिन्न राजनीतिक दल तथा संघ संस्थाका प्रतिनिधि र सरोकारवाला निकायहरूको उपस्थितिमा देवदह नगरपालिकालाई ‘सहयोगापेक्षी सडक आश्रित मानवमुक्त’ घोषणा गरिएको हो । घोषणासँगै अब देवदह नगरपालिकामा कोही पनि बेसहारा बेवारिसे, अशक्त र अनाथ भई बस्नुपर्ने अवस्थाको अन्त्य भएको र यसको लागी नगर प्रमुख खरेलले प्रतिबद्धता समेत व्यक्त गरेका छन् ।

मानव सेवा आश्रमले कोही पनि मानिस बेवारिसे भएर सडकमा जीवन बिताउन नपरोस् भन्ने उद्देश्यले विगत १३ वर्षदेखि सहयोगापेक्षी सडक आश्रित मानवहरूका लागि उपचार र उपचारपछि खाना, नाना, छाना, स्वास्थ्य र शिक्षाको व्यवस्थापन गर्दै आएको जनाएको छ ।