खोटाङको कोसाकेला गाउँपालिका–१ बाँझेच्यानडाँडाका केशरबहादुर बुढाथोकीले करिब सात दशकपछि नेपाली नागरिकताको प्रमाणपत्र प्राप्त गरेका छन्। विसं २०१३ फागुन ७ गते जन्मिएका बुढाथोकीले आइतबार पहिलो पटक जिल्ला प्रशासन कार्यालयबाट नागरिकता लिएका हुन्।
नागरिकता नहुँदा छोरीहरू शिक्षा, स्वास्थ्य र रोजगारीबाट वञ्चित हुनुपरेको भन्दै ढिलै भए पनि नागरिकता लिएको उनले बताए । १४ वर्षको उमेरमा रोजगारीका लागि भारत गएका उनी फर्किएपछि कञ्चनपुरमा मजदुरी गर्दै स्थानीय लीला भट्टसँग विवाह गरेका थिए। उनका २२ र आठ वर्षीया दुई छोरी छन्। जेठी छोरी कक्षा १२ मा अध्ययनरत छन्।
५६ वर्षपछि घर फर्किएका बुढाथोकीलाई जेठा दाजु मदनबहादुरको सनाखतमा नागरिकता प्रदान गरिएको हो। “आफूका लागि होइन, छोरीहरूको भविष्यका लागि नागरिकता आवश्यक रहेछ,” उनले भने।
नागरिकता पाएसँगै विवाह दर्ता र छोरीहरूको जन्मदर्ता गर्ने तयारी रहेको उनले बताए। करिब सात दशकपछि नागरिकता प्राप्त हुँदा परिवारमा नयाँ आशा थपिएको भतिज श्यामकुमारले बताए।
चेतनाको अभावमा नागरिकता नबनाउँदा धेरै परिवारका छोराछोरी समस्यामा परेको जिल्ला प्रशासन कार्यालयले जनाएको छ।
