भारतले भारतीय इनर्जी एक्सचेन्ज (आइएक्स) मार्फत प्रतिस्पर्धी दरमा ६५४ मेगावाट विद्युत् आयात गर्न नेपाललाई दिइएको अनुमति नवीकरण गरेको छ।
भारतको विद्युत् मन्त्रालय अन्तर्गतको केन्द्रीय विद्युत् प्राधिकरणले डे–अहेड र रियल टाइम मार्केटबाट चौबिसै घण्टा (आरटिसी) विद्युत् आयात गर्न अनुमति नवीकरण गरेको हो। यसअघि दिइएको अनुमतिको म्याद बुधबार सकिँदै थियो।
नेपाल विद्युत् प्राधिकरणले ढल्केवर–मुजफ्फरपुर ४०० केभी प्रसारण लाइनमार्फत ६०० मेगावाट र टनकपुर–महेन्द्रनगरबाट ५४ मेगावाट गरी कुल ६५४ मेगावाट विद्युत् आयात गर्नेछ।
यो अनुमति १७ पुसदेखि १७ चैत (१ जनवरी–३१ मार्च २०२६) सम्म लागू हुनेछ। १८ चैतदेखि १५ भदौ (१ अप्रिल–३१ अगस्ट २०२६) सम्मको नवीकरण पछि गरिने प्राधिकरणले जनाएको छ।
ऊर्जा मन्त्री कुलमान घिसिङले आरटिसी मोडमा विद्युत् आयातको अनुमति नवीकरण भएपछि हिउँद यामको विद्युत् माग व्यवस्थापन सहज हुने बताएका छन्।
