जेन्जी नेता मिराज ढुंगाना नेतृत्वको आन्दोलनले जिल्ला प्रशासन कार्यालयबाट अनुमति नलिएका कारण प्रहरीले नियन्त्रणको तयारी गरेको छ ।
जिल्ला प्रहरी प्रवक्ता एसपी पवनकुमार भट्टराईका अनुसार बिहान ११ बजेदेखि माइतीघर मण्डलामा आयोजना गर्ने घोषणा गरिएको आन्दोलन नियन्त्रण गरिन लागेको हो । ‘उहाँहरु आएर त्यहीँ मात्रै बस्ने हो भने पनि जिल्ला प्रशासनबाट अनुमति लिनुपर्ने थियोे, नलिएका कारण हामी अगाडि बढ्न दिँदैनौ,’ उनले भने ।
जेन्जी अगुवा मिराज ढुङ्गानाको समूहले जेन्जीको माग, मुद्दा सम्बोधन नभएको भन्दै १० बुँदे एजेण्डासहित आन्दोलनको घोषणा गरेको छ । समूहले हिजो युवाको भावनाबमोजिम सरकार सञ्चालन नभएको आरोप लगाउँदै सोमबारदेखि शान्तिपूर्ण आन्दोलन गर्ने जनाएको थियो ।
जेन्जी अगुवा ढुङ्गानाले विकृति, विसङ्गति र भ्रष्टाचारको अन्त्यसहित सुशासनका पक्षमा भएको गत आन्दोलनको मर्म र भावनाबमोजिम परिणाम आउन नसकेकाले आफूहरू पुनःसडकमा आउन बाध्य भएको बताएका थिए ।
उनले राज्यको पुनःसंरचना, राजनीतिक स्थिरता, निष्पक्ष न्याय र संविधान पुनर्लेखनसहित संवैधानिक सुधार, पक्राउ परेका जेन्जी अभियन्ताको तत्काल रिहाइ र आन्दोलनका क्रममा युवाको हत्यामा संलग्न दोषीमाथि निष्पक्ष छानबिन गरी कडाभन्दा कडा कारबाही गर्ने माग गरेका थिए ।
