जुम्ला । जुम्लाको तातोपानी गाउँपालिका– ८ को गाग्रे पाटनमा जडीबुटी संकलन गरेर फर्किने क्रममा हिमपातको चिसोका कारण दुईजनाको मृत्यु भएको छ । तातोपानी– ८ की ३७ वर्षीया देवी शाही र वडा नं. ७ का ४६ वर्षीय मुन रावतको मृत्यु भएको जुम्लाका डिएसपी नरेन्द्र चन्दले बताउनुभयाे।
भारी हिमपातका कारण ३४ स्थानीय दुई दिनदेखि पाटनमै फसेका छन् । प्रदेश सरकारले हेलिकोप्टरमार्फत पाटनमा केही दिनलाई पुग्ने खाद्य सामग्री तथा औषधि झारेको गाउँपालिकाका प्रमुख प्रशासकीय अधिकृत मिलन बुढथापाले बताउनुभयाे । सिडिओ विजयाकुमारी प्रसाईंले राहत झार्ने क्रममा २० जना पाटनमा देखापरेको र ठाउँ–ठाउँमा धुवाँ देखिएकाले अरू पनि सुरक्षित रहेको अनुमान गरिएको बताउनुभयाे । समाचार नयाँ पत्रिका दैनिकमा प्रकाशित छ ।
