प्यूठान। प्यूठान जिल्लाको बिद्युत समस्या बारे नेपाल विद्युत प्राधिकरणका कार्यकारी निर्देशक कुलमान घिसिङको ध्यानाकार्षण भएको छ। झिमरुक गाउँपालिकाका उपाध्यक्ष प्रमोद पोख्रेलले प्यूठान नगरपालिका ८ दम्तीमा निर्माण भएको सवस्टेशन सञ्चालनको माग राखेपछि कुलमानले क्षेत्रिय कार्यालय नेपालगञ्जलाई तत्काल काम गर्न निर्देशन दिएका हुन ।
यसैगरि, दम्तीदेखी क्वाडीसम्मको बजार क्षेत्रमा रहेको नाङ्गो वितरण लाईन हटाएर कालो तार (कभर कन्डक्टेड वायर) राख्न समेत कुलमानको निर्देशन छ । तार प्राधिकरणसँग स्टकमा रहेकाले छिटो काम गर्न निर्देशन दिएको उपाध्यक्ष पोख्रेलले जानकारी दिए । उपाध्यक्ष पोख्रेलले बुधबार नेपाल विद्युत प्राधिकरणका कार्यकारी निर्देशक घिसिङलाई भेटेर सव-स्टेशन सञ्चालनमा ढिलाई हुँदा जिल्लावासीले भोग्नुपरेको समस्या तत्काल समाधान गर्न ध्यानाकार्षण गराएका थिए ।
अहिले सवस्टेशनको वितरण लाइन बिस्तारको काम अलपत्र छ । लाइन विस्तारका लागि गाडिएका पोलसमेत झिमरुक नदिको भेलले बगाउन थालेको छ। कतिपय पोल ढलेका छन् ठेकेदार कम्पनीले आयोजना समयमै सक्ने विषयमा चासो दिएको छैन ।
