प्राय सडकहरुमा गाई वस्तु लगायतका चौपायाहरुको अवरोधका कारण विभिन्न घटनाहरुको घटिरहेका हुन्छन । अझ रातीको समय बिच सडकमा बस्ने छाडा चौपायाहरुको कारण दुर्घटना भई कतिपयले ज्यान समेत गुमाउन परेको छ । यसैलाई मध्यनजर गर्दै तिहारको तेस्रो दिन आज गाई तिहारको अवसरमा नेकपा (एमाले) निकट राष्ट्रिय युवा संघ नेपाल बुटवल वडा नं. ८ ले बुटवलको सुख्खानगरका सडक तथा सार्वजनिक स्थानहरुमा रहेका छाडा गाई वस्तुलाई रिफ्लेक्टिभ बेल्ट लगाइदिने काम गरेको छ । बुटवलको रामग्राम क्षेत्रमा जंगल भएको हुँदा राजमार्ग चौराहादेखि औद्योगिक क्षेत्रसम्मको सडकमा गाईवस्तुको चाप बढि नै हुने गरेको छ ।
गाई तिहारको अवसर पारेर गाईको पुजा सँगसँगै सडकमा बेवारिसे अवस्थामा हिडडुल गरेका र सडकमा बसेका १०० वटा गाई वस्तुलाई यस प्रकारको बेल्ट लगाई दिएको राष्ट्रिय युवा संघ नेपालका केन्द्रीय सदस्य मेखबहादुर पुनले बताउनुभएको थियो ।
‘खास गरिकन रात्रीको समयमा गाई वस्तु सडकको बिचमा बसिदिने र स्पिडमा आएका सवारी साधनले नदेखेर सडक दुर्घटना धेरै भएको हुँदा हामीले यस्तो अभियानको सुरुवात गरेका हौं – अभियानकर्ता तथा प्रोग्रेशिभ इन्जिनियर एशोसियनका जिल्ला अध्यक्ष राजन पाण्डेले बताउनुभएको छ ।
