देवदह । विश्व शान्ति दिवसको पूर्व सन्ध्यामा देवदहमा प्रभातफेरी कार्यक्रम सम्पन्न भएको छ । देवदह स्काउट दलको आयोजनामा भएको प्रभातफेरी कार्यक्रम देवदह मा.वि परिसरबाट सुरु भई शित्तलनगर, शान्तिनगर, बनकित्ता हुँदै पुनः विद्यालय प्राङ्गणमा आई सम्पन्न भएको हो । प्रभातफेरीमा सहभागी स्काउटरहरुले शान्तिप्रति उत्प्रेरणा जगाउने विभिन्न नारा लेखिएका प्लेकार्डहरु बोकेका थिए ।
सो अवसरमा बोल्दै विद्यालयका प्रधानाध्यापक हरी प्रसाद पाण्डेले समाजमा भएका बिकृति विसङ्गति आदिलाई जराबाट हटाउन आ-आफ्नो कर्तव्यमा कटिबद्ध भएर लाग्न सबैलाई आग्रह गर्नुभएको थियो । उहाले समाजमा शान्ती कायम राख्न आम नागरिक सबैको उत्तिकै भुमिका रहने र सबैले आफ्नो दायित्व पुरा गर्नु पर्ने कुरामा जोड दिनुभएको थियो ।
कार्यक्रममा देवदह नगरपालिका स्थानीय स्काउट समिति सदस्य सुरज भट्टराई, समिति सदस्य दिल कुमार विक, रोभर लिडर युवराज पन्थी, देवदह मा.विका स्काउट शिक्षक सुदिप भुसाल लगाएत देवदह स्काउट दलका स्काउटरहरुको उल्लेखनीय सहभागीता रहेको थियो ।
संयुक्त राष्ट्रसंघको आहृवानमा हरेक वर्ष सेप्टेम्बर २१ तारिखमा विश्व शान्ति दिवस मनाउने गरिएको छ ।
