भैरहवा // लुम्बिनी विकास बैंक लिमिटेडले नेपाल नेत्रज्योति संघ, लुम्बिनी नेत्र विज्ञान अध्ययन संस्थान श्री रण अम्बिका शाह आँखा अस्पताल भैरहवालाई मेडिकल उपकरण हस्तान्तरण गरेको छ । बैंकले सामाजिक उत्तरदायित्व अन्तर्गत अस्पताललाई ५ लाख ३६ हजार ७ सय ५० रुपैयाँ बराबरको मेडिकल उपकरण (आँखामा प्रेसर नाप्ने मेसिन) हस्तान्तरण गरेको हो ।
सोमबार एक कार्यक्रमकाबीच बैंकका बजार व्यवस्थापन विभाग प्रमुख दीपक खनालले अस्पताल विकास समितिका अध्यक्ष सागर प्रताप राणालाई हस्तान्तरण गरेका हुन् ।
कार्यक्रममा बोल्दै अस्पताल विकास समितिका अध्यक्ष राणाले बेलाबखत विभिन्न बैंकबाट हुने सहयोगले अस्पताललाई ठूलो राहत मिलेको बताए । उनले आगामी दिनमा पनि लुम्बिनी विकास बैंकबाट सहयोग हुने अपेक्षा गरे । अध्यक्ष राणाले आँखासम्बन्धी समस्या भए त्यसलाई गम्भिरतापूर्वक लिनुपर्ने बताए । उनले आँखा जस्तो संवेदनशील कुरालाई निदान गर्नेतर्फ अगाडि बढे निश्चित रुपमा राम्रो उपचार हुने बताए ।
उनले भने, ‘हामीलाई धेरै महंगो उपकरण खरिद गर्न बडो ग्राहो छ, यो नाफा लिने नभइ सेवामूलक संस्था हो, त्यसकारण हामी निजी अस्पतालको तुलनामा निश्चित रुपमा यो अस्पतालको आर्थिक अवस्था कमजोर छ । ’ उनले विभिन्न किसिमका उपकरणलाई आजको आधुनिक समयअनुसार परिपूर्ति गर्न आवश्यक रहेको बताए । आँखासम्बन्धी रोगको निदानका लागि नेपाल नेत्र ज्योति संघले राष्ट्रव्यापी रुपमा जिम्मेवारी पाएको र त्यो जिम्मेवारी निर्वाह गर्नका लागि निश्चित रुपमा अगाडि बढेको उनको भनाइ थियो ।
बैंकका बजार व्यवस्थापन विभाग प्रमुख दीपक खनालले सेवाको भावनाले उत्पे्ररित भएको अस्पताललाई मेडिकल उपकरण हस्तान्तरण गर्न पाउँदा खुसीको अनुभुति भएको बताए । उनले आगामी दिनमा पनि अस्पतालसँगको सहयात्रालाई निरन्तरता दिने प्रतिवद्धता व्यक्त गरे । बैंकले नाफा कमाउने उद्देश्य मात्र नराखी संस्थागत सामाजिक उत्तरदायित्वलाई पनि अगाडि बढाएको उनको भनाइ थियो । बैंकले ८६ वटा शाखामार्फत ग्राहकहरुलाई सेवा प्रदान गरिरहेको खनालले जानकारी दिए ।
अस्पतालका निमित्त चिफ मेडिकल डाइरेक्टर सह–प्राध्यापक डा. कबिन्द्र बज्राचार्यले अस्पताललाई सबै आवश्यक उपकरण किन्न नसक्ने आवश्यकता रहेकोमा अवस्थामा बैंकले सहयोग गर्नु सराहनीय रहेको बताए ।
उनले सेवाको लागि अगाडि बढेको अस्पताललाई बैंकले दान गरेर ठूलो सहयोगको काम गरेको बताए । उनले बैंकको कार्यबाट प्रेरित भएर अन्य संघ–संस्थाले पनि अस्पताललाई सहयोग गर्ने बताए ।
अस्पताल विकास समितिका अध्यक्ष सागर प्रताप राणाको अध्यक्षता, निमित्त चिफ मेडिकल डाइरेक्टर सह–प्राध्यापक डा. कबिन्द्र बज्राचार्यको स्वागत तथा सूचना अधिकारी प्रतीक पाण्डेको सञ्चालनमा कार्यक्रम सम्पन्न भएको थियो ।
