बुटवल । १५ वर्ष लगातार बंगलादेशमा शासन गरेकी शेख हसिना आफ्नो सरकारविरोधी आन्दोलनका कारण ज्यानै खतरामा परेपछि गत सोमबार देश छोडे लगत्तै सेना प्रमुख जनरल वकेर–उज–जमानले सबै दलको सहभागितामा अन्तरिम सरकार गठन हुने घोषणा गरेका थिए ।
बंगलादेशका विद्यार्थी नेताले अन्तरिम सरकार नोबेल विजेता मोहम्मद युनुसको नेतृत्वमा गठन गरिनुपर्ने बताउदै आए अनुसार नै सन् २००६ को नोवेल पुरस्कार विजेता मुहम्मद युनुस नेतृत्वमा गठन भएकाे १७ सदस्यीय अन्तरिम सरकारमा दुई जना विद्यार्थी नेता परेका छन् ।
दुवै विद्यार्थी नेता बंगलादेशको ढाका विश्वविद्यालयका हुन् । २५ वर्षीय आसिफ महोमद सजिब भुइयान र २६ वर्षीय नाहिद इस्लाम युनुस सरकारमा अटेका छन् ।
भारतीय अखबार दि हिन्दूका अनुसार आसिफ ढाका विश्वविद्यालयका भाषाविज्ञान संकायका स्नातकोत्तर तहका विद्यार्थी र नाहिद समाजशास्त्रका विद्यार्थी हुन् । आसिफ सन् २०१७ र २०१८ को व्याचका विद्यार्थी तथा ढाका विश्वविद्यालयका छात्र अधिकार परिषद्का विद्यार्थी नेता हुन् ।
नाहिद सन् २०१६ र २०१७ को व्याचका विद्यार्थी भएको भारतीय समाचार पोर्टल दि वायरले उल्लेख गरेको छ । आसिफ र नाहिद दुवै बंगलादेशको जुलाई १५ बाट चर्किएको कोटाविरोधी आन्दोलनका अग्र पंक्तिका विद्यार्थी नेता हुन् । आसिफ पूर्वी बंगलादेशको कुमिला महानगरका हुन् । नाहिद चैँ ढाकाकै रैथाने हुन् ।
