देवदह // रुपन्देहीको देवदहमा प्याब्सन देवदह नगर समितिले २०७८ सालको एसईई परीक्षामा ३.६ वा सो भन्दा माथि जीपीए ल्याएका विद्यार्थीहरुलाई सम्मान गरेको छ । देवदह भित्र रहेका विद्यालयका विद्यार्थीहरुलाई सनिवार सम्मान–पत्रद्वारा सम्मान गरिएको हो ।
कार्यक्रममा बोल्दै कार्यक्रमका प्रमुख अतिथि देवदह नगरपालिकाका नगर प्रमुख धुर्व खरेलले शिक्षामा रुपान्तरण जरुरी रहेको बताउदै अब शिक्षालाई प्राविधिक शिक्षा संग जोड्न आवश्यक रहेको बताउनुभयो। उहाले संस्थागत र सामुदायिक विद्यालयमा अन्तर रहेको र संस्थागत विद्यालयको व्यवस्थापन उत्कृष्ट छ जुन सामुदायिक विद्यालयमा केही कमजोरी रह्यो त्यो कारणले गर्दा पनि सामुदायिक विद्यालय पछि परेको बताउनुभयो । उहाले देवदहलाई शैक्षिक हवको रुपमा विकास गर्न सामुदायिक र संस्थागत दुबैको सहकार्य जरुरी रहेको बताउनुभयो ।
कार्यक्रममा देवदह नगरपालिका प्रमुख प्रशासकीय अधिकृत प्रदिप पौडेल, नगर शिक्षा अधिकृत पर्शुराम ढकाल, प्याब्सन देवदहका प्रमुख सल्लाहकार बोधराज गौडेल, प्याब्सन देवदहका सल्लाहकार एकनारायण काफ्ले, नगर शिक्षा समिति सदस्य चक्रपाणी तिवारी, सञ्चारकर्मी त्रीलोचन दाहाल, देवदह मदर टङ्गसका भिम गुरुङ, रेडियो देवदह तथा सेभेन स्टार स्कुलका अध्यक्ष प्रजापति सापकोटा, नेकपा माओवादी केन्द्रका नगर अध्यक्ष गोविन्द ठट्ट्राई, नेकपा एकीकृत समाजवादीका नगर अध्यक्ष टंक पोखरेल लगाएतले बोल्दै सभ्य समाज निर्माणका लागि गुणस्तर शिक्षा आवश्यक रहेको बताएका थिए ।
सोही कार्यक्रममा देवदह नगरपालिकाले सञ्चालन गरेको कक्षा ५ र ८ मा उत्कृष्ट आउने विद्यार्थीलाई समेत सम्मान गरिएको थियो । कार्यक्रम प्याब्सन नगर समिति अध्यक्ष राम बहादुर गुरुङको अध्यक्षता , कोषाध्यक्ष टिकाराम चापागाईंको स्वागत र सचिब कृष्ण गैरेको सञ्चालनमा भएको थियो ।
