पाल्पा — शिक्षक आन्दोलनका कारण तीन सातादेखि बन्द रहेको पाल्पाको माथागढी गाउँपालिका–१ स्थित ज्ञानोदय आधारभूत विद्यालय अभिभावकको दबाबपछि आजदेखि पुनः सञ्चालनमा आएको छ।
विद्यालय बन्दले विद्यार्थीको भविष्य प्रभावित हुने भन्दै सोमबार अभिभावकहरूले विद्यालयमै पुगेर व्यवस्थापन समितिमा दबाब दिएका थिए। ‘विद्यालय खोल, भविष्य जोगा’ भन्ने नारासहितको दबाबपछि पठनपाठन सुरु गरिएको विद्यालय व्यवस्थापन समितिका अध्यक्ष राजकुमार पन्थीले जानकारी दिए।
उनका अनुसार अभिभावक, शिक्षक र विद्यार्थीबीच छलफलपछि आजदेखि नियमित कक्षा सञ्चालन गरिएको हो। वडा भित्रका अन्य विद्यालयहरूमा पनि क्रमशः पठनपाठन सुरु भएको छ।
शिक्षा ऐन जारी गर्न माग गर्दै शिक्षक तथा कर्मचारीहरू गत चैत २० गतेदेखि काठमाडौंमा आन्दोलनरत छन्।
