रुपन्देही । देवदह नगरपालिकाले तिहार पर्वलाई आफ्नो मौलिक रीति, परम्परा र संस्कृति प्रोत्साहित गर्ने गरी सभ्य तरिकाले मनाउन सबैलाई अनुरोध गरेको छ । तिहारको अवसरमा खेलिने देउसी भैलो कार्यक्रम सञ्चालन गर्दा खेल्दा ठूलो आवाजमा साउण्ड सिस्टम प्रयोग नगर्ने, राती ९ बजेपछि नखेल्ने, नेपाली रीति रिवाज, परम्परा र नेपाली संस्कृतिलाई प्रोत्साहन गर्ने लगायतका विषयमा कार्यपालिकाको बैठकबाट निर्णय गरी सार्वजनिक गरेको नगर प्रवक्ता गणेश डुम्रेले जानकारी गराउनुभएको थियो ।
नगरपालिकाले जुवा तास कौडा सट्टेबाजी झण्डापूर्जा लगायत खेल खेल्न र खेलाउन प्रतिबन्ध समेत लगाएको छ । मदिरा र मदिराजन्य वस्तुको विक्रि वितरण रातीको ९ बजेसम्म अनुमति प्राप्त व्यवसायीबाट मात्र गर्ने । प्रशासनबाट स्वीकृत नलिई कुनै पनि चिठ्ठा उपहारका कार्यक्रम संचालन नगर्ने नगराउने । त्यसैगरी पटाका लगायतका प्रज्वलनशील वस्तु पड्काउन र आतिसबाजी नगराउने नगर्ने, विष्फोटक पदार्थको उत्पादन भण्डारण विक्रि वितरण परिवहन र पैठारी नगर्न नगराउर्न सबैलाई अपिल गरेको प्रवक्ता डुम्रेले बताउनुभएको हो ।
चाडपर्वको मुखमा मुल्यवृद्धि र कालाबजारी हुने गरेको बताउदै सम्पूर्ण व्यवसायी तथा व्यपारीहरुले पसलहरुमा अनिवार्य रुपमा मूल्य सूची राख्न समेत अपिल गरेको छ । त्यस्तै नगर भित्रको स्थानीय फूलहरुको उत्पादनलाई प्रवर्धन गर्न र फूल उत्पादक किसानहरुलाई प्रोत्साहन गर्नको लागि आउँदै गरेका तिहार छठ लगायतका पर्वहरुमा स्थानीय फूलमालाको मात्र प्रयोग गर्नको लागि नगरवासीहरुमा नगरपालिकाले अनुरोध समेत गरेको छ ।
